बजेट अधिवेशनलाई प्रभावकारी बनाउने सभामुखको तयारी, पारदर्शिता र पहुँच विस्तारमा जोड

बजेट अधिवेशनलाई प्रभावकारी बनाउने सभामुखको तयारी, पारदर्शिता र पहुँच विस्तारमा जोड
काठमाडौं — सभामुख डीपी अर्यालले आगामी बजेट अधिवेशनलाई फरक र प्रभावकारी बनाउने तयारी भइरहेको बताएका छन्। पत्रकारहरूसँगको अन्तर्क्रियामा बोल्दै उनले संसद्मा पारदर्शिता र पहुँच विस्तार आफ्नो प्रमुख प्राथमिकता रहेको उल्लेख गरे।
उनले संसदीय गतिविधि र समितिहरूमा सञ्चारकर्मीहरूको सहज पहुँच सुनिश्चित गर्न आवश्यक व्यवस्था मिलाइने बताए। हाल अस्थायी संसद् भवनका कारण देखिएका प्राविधिक तथा व्यवस्थापकीय समस्या क्रमशः समाधान गर्दै लैजाने प्रतिबद्धता पनि उनले व्यक्त गरे।
सभामुख अर्यालका अनुसार पत्रकारहरूको पास, कार्ड तथा रिपोर्टिङ पहुँचसम्बन्धी विषयलाई सन्तुलित ढङ्गले व्यवस्थापन गर्नुपर्ने आवश्यकता छ, ताकि कुनै पनि समूहलाई विभेद भएको महसुस नहोस्।
उनले प्रतिनिधि सभा नियमावलीको मस्यौदा तयारी भइरहेको जानकारी दिँदै सबै सरोकारवालाको सहभागिता आवश्यक रहेको बताए। लोकतन्त्रको मूल आधार अभिव्यक्ति स्वतन्त्रता भएको उल्लेख गर्दै उनले संविधान र कानुनको दायराभित्र रहेर सबैलाई आफ्ना धारणा राख्ने अधिकार रहेको स्पष्ट पारे।
विगतका केही अभ्यासहरू समयअनुकूल नभएको हुन सक्ने भन्दै उनले नयाँ पुस्ता, प्रविधि र वर्तमान सामाजिक संरचनाअनुसार नयाँ नजिर स्थापित गर्नुपर्ने आवश्यकता औँल्याए।
साथै संसदीय समितिहरूलाई खुला र पारदर्शी रूपमा सञ्चालन गर्ने अपेक्षा आफूले राखेको पनि सभामुख अर्यालले बताएका छन्।

#onlinepatinews