🚨 ग्यास अभावमा प्रशासनको एक्सन, डिपोमा सादा पोशाकका प्रहरी परिचालन

काठमाडौंमा खाना पकाउने एलपी ग्यासको अभाव चुलिँदै गएपछि जिल्ला प्रशासन कार्यालय काठमाडौंले ग्यास डिपो तथा बिक्री केन्द्रमा सादा पोशाकका सुरक्षाकर्मी परिचालन गरेको छ।

पहुँच र चिनजानका आधारमा ग्यास बिक्री भइरहेको गुनासो बढेपछि प्रशासनले विशेष निगरानी थालेको हो। प्रशासनका अनुसार विभिन्न डिपो, पसल, फर्म र कम्पनीमा सूक्ष्म निगरानी भइरहेको छ र प्राप्त प्रतिवेदनका आधारमा आवश्यक कानुनी कारबाही गरिनेछ।

प्रशासनले पहुँचका आधारमा ग्यास बिक्री गर्ने, कृत्रिम अभाव सिर्जना गर्न सिलिन्डर लुकाउने वा भण्डारण गर्ने कार्यमा संलग्न पाइए हदैसम्मको कानुनी कारबाही हुने तथा ग्यास सिलिन्डरसमेत जफत गरिने चेतावनी दिएको छ।

यता, पछिल्ला केही दिनदेखि काठमाडौं उपत्यकासहित विभिन्न स्थानमा उपभोक्ता ग्यासका लागि घण्टौँ लाइनमा बस्न बाध्य छन्। तर नेपाल आयल निगमले भने देशभर ग्यासको आपूर्ति नियमित रहेको र बजारमा वास्तविक अभाव नभएको दाबी गर्दै आएको छ।

#GasCrisis #Kathmandu #NepalNews #OnlinePatiNews #onlinepatinews