खुलामञ्चको क्षति आफ्नै खर्चमा मर्मत गर्दै कांग्रेस : ४५ दिनभित्र पुनः हराभरा बनाइने। काठमाडौँ । नेपाली कांग्रेसले १५औँ महाधिवेशनका क्रममा ऐतिहासिक खुलामञ्चमा पुगेको क्षतिको आफैँ खर्च बेहोरेर मर्मत गर्ने भएको छ। सार्वजनिक पूर्वाधार र वातावरणीय संवेदनशीलतालाई ध्यानमा राख्दै खुलामञ्चलाई पूर्ववत् सुन्दर तथा हराभरा अवस्थामा फर्काउन पार्टीले मर्मत सम्भारको प्रक्रिया अघि बढाएको हो। काठमाडौँ महानगरपालिकाको नियम र मापदण्डअनुसार खुलामञ्चको पुनर्स्थापनाका लागि कांग्रेसले सेवा प्रदायक संस्था माउन्ट एभरेस्ट स्पोर्टस् एन्ड इभेन्ट्स प्रालिसँग सम्झौता गरेको छ। वरिष्ठ उपसभापति विश्वप्रकाश शर्माको रोहवरमा कांग्रेसका कार्यवाहक मुख्यसचिव कृष्णप्रसाद दुलाल र सेवा प्रदायक संस्थाका प्रतिनिधि थमन भुषालले सम्झौतापत्रमा हस्ताक्षर गरेका हुन्। सम्झौताअनुसार महाधिवेशनका क्रममा क्षति पुगेको जमिन सम्याएर उच्च गुणस्तरको नयाँ दुबो रोप्ने तथा प्राविधिक रेखदेखसहित उचित स्याहार गरिनेछ। यस कार्यको सम्पूर्ण आर्थिक भार कांग्रेस स्वयंले बेहोर्नेछ। पुनःस्थापनाका लागि कुल ४५ दिनको समयसीमा तोकिएको छ। जसअन्तर्गत पहिलो १५ दिनभित्र दुबो रोप्ने कार्य सम्पन्न गरिनेछ भने बाँकी ३० दिन नियमित सिँचाइ र गोडमेल गरी खुलामञ्चलाई पूर्ण रूपमा हराभरा बनाइनेछ। कामको सहजीकरण तथा स्वयंसेवक परिचालनको जिम्मेवारी नेपाली कांग्रेस काठमाडौँ महानगर समितिलाई दिइएको छ, जसको संयोजन महानगर सभापति इन्जिनियर सुसन वैद्यले गर्नेछन्। निर्माण तथा मर्मत सम्पन्न भएपछि महानगरपालिकाको मापदण्डबमोजिम खुलामञ्च परिसर महानगरलाई हस्तान्तरण गरिनेछ। वित्तीय सम्झौताअनुसार कुल रकमको ८० प्रतिशत पेश्की उपलब्ध गराइनेछ भने बाँकी २० प्रतिशत रकम काम सम्पन्न भएपछि भुक्तानी गरिने व्यवस्था मिलाइएको छ। सार्वजनिक कार्यक्रम सम्पन्न भएपछि संरचनाको मर्मत गरी पुरानै रूपमा फर्काउने कांग्रेसको यो निर्णयले सकारात्मक सन्देश दिएको छ। #onlinepatinews #Khulamanch #NepaliCongress #Kathmandu