आन्तरिक पर्यटकको आकर्षण बन्दै भानु–९ को चितिखोला
तनहुँ । तनहुँको भानु नगरपालिका–९, चितिखोला पछिल्लो समय आन्तरिक पर्यटकका लागि आकर्षणको केन्द्र बन्दै गएको छ। प्राकृतिक सौन्दर्य, धार्मिक तथा सांस्कृतिक सम्पदा, जङ्गली पदमार्ग, झरना, होमस्टे तथा कृषि पर्यटनका कारण चितिखोलामा पर्यटकको चहलपहल बढ्दै गएको हो।
चितिखोला पुग्न पृथ्वी राजमार्गअन्तर्गत डुम्रे बजारबाट करिब २० किलोमिटरको दूरीमा रहेको अर्चलधारासम्म पुगेपछि त्यहाँबाट करिब एक किलोमिटर पक्की सडक हुँदै पुग्न सकिन्छ।
चितिखोलामा पर्यटकका लागि विभिन्न आकर्षणहरू रहेका छन्। यहाँ रहेको नक्षत्रबाटिकाभित्र सामुदायिक चिया खेती, शिव मन्दिर, योग तथा ध्यानशाला लगायतका संरचना छन्। त्यस्तै, बाघेखोलामा रहेको कालिका मन्दिर र मन्दिरको आडमा रहेको ढुङ्गेधाराले पनि पर्यटकलाई आकर्षित गर्ने गरेको छ।
यहाँ करिब चार किलोमिटर लामो जङ्गली पदमार्गसमेत रहेको छ। पदयात्राका क्रममा चितुवा, खरायो, मृग, वनबिरालोलगायत विभिन्न जङ्गली जनावर अवलोकन गर्न सकिने स्थानीयको भनाइ छ। साथै, करिब ५० प्रजातिका चराचुरुङ्गीको आवाज सुन्दै प्राकृतिक वातावरणमा रमाउन सकिन्छ।
पदमार्गको बीच–बीचमा रहेका प्राकृतिक छाँगा–छहराको कलकल आवाज, विभिन्न प्रजातिका जङ्गली वनस्पति, लहरा तथा फूलहरूले पर्यटकलाई प्रकृतिसँग नजिक हुने अवसर प्रदान गर्छन्। यात्राका क्रममा ढुङ्गे चौतारीमा बसेर उत्तरतर्फ देखिने हिमशृङ्खलाको मनोरम दृश्यसमेत अवलोकन गर्न सकिन्छ।
चितिखोलाको अर्को महत्वपूर्ण विशेषता यहाँको होमस्टे तथा ग्रामीण पर्यटन हो। होमस्टेमा बसेर मगर समुदायको संस्कृति, परम्परा, खानपान, रहनसहन तथा स्थानीय जीवनशैलीबारे नजिकबाट बुझ्न सकिन्छ। पर्यटकले रोटे पिङको आनन्द लिनुका साथै स्थानीय मौलिक नाच चुड्कासमेत हेर्न पाउने अवसर पाउँछन्।
माछा मार्ने रुचि भएका पर्यटकका लागि चितिखोलामा माछा मार्ने अनुभवसमेत लिन सकिने व्यवस्था रहेको छ। त्यस्तै, हिमालय अर्गानिक फार्मस्टेमा प्राकृतिक हरियालीसँगै स्थानीय तथा स्वादिष्ट खानपान र आरामदायी बसोबासको सुविधा लिन सकिन्छ।
चितिखोलाको अर्को आकर्षण चद्रे खोला झरना हो। यहाँ तीनवटा छाँगा रहेका छन्। साहसिक पर्यटनमा रुचि राख्ने पर्यटकका लागि यी झरनामा क्यानोनिङको सम्भावनासमेत रहेको छ।
यस क्षेत्रको भ्रमणका क्रममा विभिन्न कृषि तथा पशुपालन फार्महरूको अवलोकन गर्न सकिन्छ। फलफूल खेती, कुखुरापालन, बङ्गुरपालन, बाख्रापालन, गाई–भैंसीपालन, मौरीपालन तथा तरकारी खेतीलगायतका गतिविधि प्रत्यक्ष रूपमा हेर्न सकिने भएकाले चितिखोला कृषि पर्यटनका लागि समेत सम्भावनायुक्त क्षेत्र बनेको छ।
विभिन्न समुदायका मानिसहरूको बसोबास रहेको चितिखोलामा संस्कृति, भाषा, खानपान, बोलचाल र रहनसहनमा समेत विविधता पाइन्छ। यही विविधता र प्राकृतिक सुन्दरताले चितिखोलालाई पर्यटकका लागि थप आकर्षक बनाएको छ।
प्राकृतिक सौन्दर्यसँगै धार्मिक, सांस्कृतिक, साहसिक र कृषि पर्यटनको अनुभव एकै ठाउँमा लिन चाहनेहरूका लागि चितिखोला उपयुक्त गन्तव्य बन्न सक्छ। त्यसैले तनहुँ तथा आसपासका जिल्लाका आन्तरिक पर्यटकले चितिखोलाको भ्रमणलाई आफ्नो यात्राको तालिकामा समावेश गर्न सक्ने स्थानीयवासीको आग्रह छ।
चितिखोला—प्रकृति, संस्कृति र ग्रामीण जीवनको सुन्दर संगम।
#onlinepatinews #Tanahun #BhanuMunicipality #