विद्युत् र सिँचाइ पूर्वाधार निरीक्षण गर्न ऊर्जामन्त्री श्रेष्ठ कोशी प्रदेश जाँदै। काठमाडौँ । ऊर्जा, जलस्रोत तथा सिँचाइमन्त्री विराजभक्त श्रेष्ठ विद्युत् तथा सिँचाइ पूर्वाधारको स्थलगत निरीक्षणका लागि आज कोशी प्रदेश जाँदै हुनुहुन्छ।मन्त्री श्रेष्ठसहितको टोली आज दिउँसो १ बजे विराटनगर प्रस्थान गर्नेछ। भ्रमणका क्रममा पूर्वी क्षेत्रमा देखिएका विद्युत् समस्या, प्रसारण लाइन तथा अन्य पूर्वाधारको अवस्थाबारे स्थलगत निरीक्षण गरिनेछ। साथै सिँचाइको पहुँच, नहरको अवस्था र आवश्यक सुधारका विषयमा पनि अध्ययन गरिने मन्त्रालयले जनाएको छ।तीन दिने भ्रमणका क्रममा इनरुवास्थित ४०० केभी भोक्राहा सबस्टेसन, केरौना सबस्टेसन तथा बराहक्षेत्र–चतरा नहरको निरीक्षण गर्ने कार्यक्रम छ। यस्तै, नेपालको ऐतिहासिक चन्द्र नहरको समेत स्थलगत अवलोकन गरिनेछ।मन्त्री श्रेष्ठको टोलीमा मन्त्रालयका सचिव सरिता दवाडी, सहसचिव मोहनकुमार शाक्य, मन्त्रीका निजी सचिव सुदर्शन श्रेष्ठ, सचिवालय सदस्य देवेश बेल्बासेलगायत सहभागी हुनुहुनेछ।यस्तै, जलस्रोत तथा सिँचाइ विभागका महानिर्देशक डा. महेश्वर श्रेष्ठ, उपमहानिर्देशक दिनेश भट्ट तथा नेपाल विद्युत् प्राधिकरणका कामु निर्देशक दीर्घायुकुमार श्रेष्ठसहितका अधिकारी पनि टोलीमा रहनेछन्।मन्त्री श्रेष्ठले यसअघि सुदूरपश्चिम, कर्णाली र लुम्बिनी प्रदेश पुगेर त्यहाँका विद्युत् तथा सिँचाइसम्बन्धी समस्या प्रत्यक्ष रूपमा अवलोकन गर्नुभएको थियो।