खगेन्द्र सुनारसँग नाम जोडिएका, साउदीका लागि प्रस्तावित राजदूत गिरिबहादुर सुनारको नाम संसदीय सुनुवाइ समितिबाट सर्वसम्मत अस्वीकृत। काठमाडौँ । साउदी अरबका लागि प्रस्तावित नेपाली राजदूत गिरिबहादुर सुनारको नाम संसदीय सुनुवाइ समितिले सर्वसम्मतिले अस्वीकृत गरेको छ। बुधबार बसेको समितिको बैठकले सुनारको नैतिक आचरण तथा विगतका विवादलाई लिएर प्रश्न उठेपछि राजदूतका लागि उच्च नैतिक चरित्र नपुगेको ठहर गर्दै उनको नाम अनुमोदन गर्न अस्वीकार गरेको हो। सुनुवाइ प्रक्रियाका क्रममा सांसदहरूले उनीमाथि परेका गम्भीर उजुरी, महिला हिंसासँग सम्बन्धित पुरानो विवाद, प्रहरीमा भएको मिलापत्र तथा जर्मनीबाट डिपोर्ट भएको भनिएको विषयमा प्रश्न उठाएका थिए। छलफलका क्रममा सुनारले आफूमाथिका आरोपहरूको खण्डन गर्दै व्यक्तिगत विषयलाई लिएर चरित्र हत्या गर्न खोजिएको दाबी गरेका थिए। यद्यपि, मुलुकको प्रतिनिधित्व गर्ने कूटनीतिक पद विवादरहित र उच्च नैतिक चरित्रको हुनुपर्ने निष्कर्ष निकाल्दै समिति सभापति बोधनारायण श्रेष्ठले सुनारको नाम अस्वीकृत भएको औपचारिक घोषणा गरे। गत असोज २ गते मन्त्रिपरिषद् बैठकले सुनारसहित विभिन्न १३ देशका लागि राजदूत सिफारिस गरेको थियो। संसदीय सुनुवाइ समितिबाट नाम अस्वीकृत भएसँगै उनको राजदूत बन्ने प्रक्रिया रोकिएको छ। #onlinepatinews #ParliamentaryHearing #GiriBahadurSunar #NepalPolitics