५ दिनमै एक्रो ब्रिज तयार, भदौ 26 बाट सञ्चालनमा आउँदै। नुवाकोट । बाढीका कारण पुल क्षतिग्रस्त भएपछि आवागमनमा समस्या भोगिरहेका नुवाकोटवासीलाई अब राहत मिल्ने भएको छ। नेपाली सेनाले पाँच दिनअघि सुरु गरेको एक्रो ब्रिज जडानको काम सम्पन्न गरेको छ। उक्त पुल पर्सिबाट सञ्चालनमा आउने भएको हो। छोटो समयमै पुल निर्माण सम्पन्न भएपछि गृहमन्त्री सुधन गुरुङले नेपाली सेनालाई धन्यवाद दिएका छन्। बाढीबाट प्रभावित नागरिकको समस्यालाई ध्यानमा राख्दै सेनाले रातदिन नभनी काम गरेर पुल तयार पारेको भन्दै उनले प्रशंसा गरेका हुन्। बाढीका कारण पुल र सडक सम्पर्क प्रभावित हुँदा स्थानीयवासीले दैनिक आवतजावतदेखि अत्यावश्यक सामग्री ओसारपसारसम्ममा सास्ती खेप्दै आएका थिए। पुल सञ्चालनमा आएपछि प्रभावित क्षेत्रको आवागमन सहज हुने अपेक्षा गरिएको छ। पुल निर्माण तथा जडानमा भौतिक पूर्वाधारमन्त्री सुनिल लम्सालको पनि निरन्तर सक्रियता रहेको थियो। सम्बन्धित निकायसँग समन्वय गर्दै कामलाई तीव्रता दिइएको बताइएको छ। रसुवामा आएको विनाशकारी बाढीले विभिन्न स्थानका पुल बगाएपछि नुवाकोट, रसुवा लगायतका क्षेत्रमा यातायात सम्पर्क प्रभावित भएको थियो। अब प्रभावित क्षेत्रको आवागमन थप सहज बनाउन बेत्रावतीमा समेत नेपाली सेनाले ब्रिज निर्माण गर्ने योजना बनाएको छ। बाढीबाट क्षतिग्रस्त पूर्वाधारलाई प्राथमिकताका साथ पुनःस्थापना गर्ने कामलाई निरन्तरता दिइने जनाइएको छ। #onlinepatinews #Nuwakot #NepalArmy #FloodUpdate