भदौको करदाता प्रोत्साहन पुरस्कार असोज १ गते घोषणा, ३३ जनाले पाउने। भदौको करदाता प्रोत्साहन पुरस्कार असोज १ गते घोषणा, ३३ जनाले पाउने काठमाडौं । रसुवाको भोटेकोशीमा आएको बाढीका कारण स्थगित भएको भदौ महिनाको करदाता प्रोत्साहन उपहार कार्यक्रमको पुरस्कार असोज १ गते घोषणा हुने भएको छ। आन्तरिक राजस्व विभागले भदौ महिनाका लागि ३३ जना विजेता छनोट गर्ने तयारी गरेको छ। जसमा दुई जनाले जनही १० लाख रुपैयाँ र ३१ जनाले जनही १ लाख ३३ हजार ३३४ रुपैयाँ पुरस्कार पाउनेछन्। करदातालाई बिल लिन तथा कर तिर्ने प्रणालीमा अभ्यस्त गराउने उद्देश्यले नयाँ आर्थिक वर्षको बजेटमार्फत सरकारले करदाता प्रोत्साहन उपहार कार्यक्रम ल्याएको हो। साउन १ गतेदेखि सुरु भएको कार्यक्रमअन्तर्गत भदौ १६ गते पुरस्कार घोषणा गर्ने तयारी भए पनि भोटेकोशी बाढीपछि उत्पन्न विपत्तिका कारण कार्यक्रम स्थगित गरिएको थियो। आन्तरिक राजस्व विभागका महानिर्देशक डा. भीष्मकुमार भुसालका अनुसार भदौ महिनाको पुरस्कार असोज १ गते घोषणा गर्ने तयारी भइरहेको छ। विभागका अनुसार भदौ १ देखि १५ गतेसम्म बिल–बिजक लिएर विभागको पोर्टलमा दर्ता गराएका तथा अनलाइनमार्फत वस्तु खरिद गरेका उपभोक्तामध्ये दैनिक एक जनाका दरले १५ जना विजेता छनोट हुनेछन्। उनीहरूले जनही १ लाख ३३ हजार ३३४ रुपैयाँ पुरस्कार पाउनेछन्। यही अवधिका उपभोक्तामध्येबाट एक जनालाई १० लाख रुपैयाँको बम्पर प्रोत्साहन पुरस्कार प्रदान गरिनेछ। त्यसैगरी, भदौ १६ देखि ३१ गतेसम्मका १६ दिनका लागि दैनिक एक जनाका दरले थप १६ जना विजेता छनोट हुनेछन्। उनीहरूले पनि जनही १ लाख ३३ हजार ३३४ रुपैयाँ पाउनेछन्। सो अवधिका कारोबारमा संलग्न उपभोक्तामध्येबाट थप एक जनालाई १० लाख रुपैयाँको बम्पर पुरस्कार दिइनेछ। यसरी असोज १ गते भदौ महिनाका लागि १ लाख ३३ हजार ३३४ रुपैयाँका ३१ जना र १० लाख रुपैयाँका दुई जना गरी ३३ जना विजेता घोषणा हुनेछन्। पुरस्कारका लागि योग्य हुन उपभोक्ताले १०० रुपैयाँभन्दा बढीको वस्तु खरिद गर्दा सक्कली भ्याट वा प्यान बिल लिनुपर्नेछ। कारोबार गर्दा सकेसम्म अनलाइन भुक्तानी गर्न विभागले आग्रह गरेको छ। अनलाइनमार्फत गरिएको कारोबार स्वतः करदाता प्रोत्साहन प्रणालीमा समावेश हुने विभागले जनाएको छ। नगदमा कारोबार गरेर सक्कली बिल लिएका उपभोक्ताले भने आन्तरिक राजस्व विभागको करदाता प्रोत्साहन पुरस्कार पोर्टलमा गई बिल अपलोड गरेर उपहार कुपन लिनुपर्नेछ। भदौ १ देखि १५ गतेसम्म बिल लिएका उपभोक्ताले भदौ १५ गतेसम्म बिल प्रणालीमा दर्ता गरी कुपन लिइसकेको हुनुपर्नेछ। भदौ १६ देखि ३१ गतेसम्म बिल लिएका उपभोक्ताले भने भदौ मसान्तको राति १२ बजेसम्म बिल दर्ता गरी कुपन प्राप्त गरिसकेको हुनुपर्ने विभागले जनाएको छ। पुरस्कार रकममा २५ प्रतिशत कर लाग्नेछ। त्यसअनुसार १ लाख ३३ हजार ३३४ रुपैयाँको पुरस्कार जित्नेले कर कटाएर १ लाख रुपैयाँ र १० लाख रुपैयाँको बम्पर पुरस्कार जित्नेले कर कटाएर ७ लाख ५० हजार रुपैयाँ नगद प्राप्त गर्नेछन्। यसअघि साउन महिनामा पनि ३३ जनाले करदाता प्रोत्साहन पुरस्कार जितेका थिए। साउन महिनाका विजेता छनोट अर्थमन्त्री डा. स्वर्णिम वाग्लेले गर्नुभएको थियो। #TaxpayerIncentive #InlandRevenue #NepalTax #TaxAwareness