जेन्जी सांसदलाई प्रधानमन्त्री शाहको आग्रह : आफ्नै पुस्ताका लागि स्वदेशमै रोजगारी सिर्जना गर्नुस्। काठमाडौं । प्रधानमन्त्री बालेन्द्र शाहले जेन्जी उमेर समूहका सांसदहरूलाई आफ्नै पुस्ताका लागि स्वदेशमै रोजगारी र अवसर सिर्जना गर्न आग्रह गरेका छन्। सिंहदरबारस्थित प्रधानमन्त्री तथा मन्त्रिपरिषद्को कार्यालयमा आज जेन्जी उमेर समूहका सांसदहरूसँग भएको अन्तरक्रियामा प्रधानमन्त्री शाहले जनजीविकाका आधारभूत समस्या समाधानसँगै युवालाई आत्मनिर्भर बनाउनेतर्फ काम गर्न आग्रह गरेका हुन्। प्रधानमन्त्री शाहले स्थलगत अध्ययन तथा अनुसन्धान गर्ने, सूचना प्रविधिको अधिकतम प्रयोग गर्ने, समस्या समाधानमुखी दृष्टिकोण अपनाउने र पुराना तथा अव्यावहारिक सोच त्याग्न सुझाव दिए। उनले राजनीतिलाई मात्र पेशा नबनाई आम्दानीको छुट्टै व्यावसायिक आधार निर्माण गर्न तथा दीर्घकालीन रूपमा आत्मनिर्भर र अरूका लागि प्रेरणाको स्रोत बन्न पनि सांसदहरूलाई आग्रह गरे। अन्तरक्रियामा सहभागी जेन्जी उमेर समूहका सांसदहरूले प्रधानमन्त्रीको सुझावलाई अभिभावकीय मार्गदर्शनका रूपमा लिँदै आफ्नै पुस्तालाई आत्मनिर्भर बनाउन र स्वदेशमै अवसर सिर्जना गर्ने कार्यमा जुट्ने प्रतिबद्धता जनाएका छन्। #onlinepatinews #BalenShah #GenZ #NepalPolitics