कानुनमन्त्री सोविता गौतम र फ्रान्सेली राजदूत इन्जाबीच शिष्टाचार भेटवार्ता। <p>काठमाडौँ ।</p> <p>कानुन, न्याय तथा संसदीय मामिलामन्त्री सोविता गौतमसँग नेपालका लागि फ्रान्सेली राजदूत फ्रान्स्वाज पुइग–इन्जा (Ms. Francoise Puig-Unza) ले सिंहदरबारस्थित मन्त्रालयमा शिष्टाचार भेट गर्नुभएको छ।</p> <p>शुक्रबार भएको भेटमा राजदूत इन्जाले भोटेकोशी बाढीका कारण ज्यान गुमाएकाहरूप्रति समवेदना व्यक्त गर्दै फ्रान्सले उपलब्ध गराएको मानवीय सहायताको स्मरण गराउनुभयो। साथै यस्ता प्राकृतिक विपत्तिले अन्तर्राष्ट्रिय समुदायलाई जलवायु परिवर्तनको गम्भीर असरबारे सचेत गराएको उहाँले उल्लेख गर्नुभयो। जलवायु संकटको जोखिम विश्वव्यापी रहेकाले विधिको शासन र बहुपक्षीयतामा विश्वास राख्ने मुलुकहरूले आ-आफ्नो अन्तर्राष्ट्रिय दायित्व पूरा गर्न गम्भीर हुनुपर्नेमा राजदूत इन्जाले जोड दिनुभयो।</p> <p>भेटका क्रममा दुई देशबीच पारस्परिक कानुनी सहायतासम्बन्धी सम्झौता प्रक्रियालाई चाँडो अघि बढाउने विषयमा पनि छलफल भएको छ। कानुन मन्त्रालय यसको केन्द्रीय निकाय भएकाले आवश्यक सहजीकरण तीव्र बनाउन दुवै पक्ष सहमत भएका छन्।</p> <p>त्यस्तै, नेपालको हवाई उड्डयन क्षेत्रलाई अन्तर्राष्ट्रिय मापदण्डअनुरूप नियामक र सेवा प्रदायक गरी दुई छुट्टाछुट्टै निकायमा रूपान्तरण गर्न संसद्‌मा दर्ता गरिएको विधेयकबारे पनि कुराकानी भएको थियो। राजदूत इन्जाले युरोपेली युनियनको हवाई सुरक्षा कालोसूची (एयर सेफ्टी लिस्ट) बाट हट्न नेपाल सरकारले चालेका कानुनी तथा नीतिगत कदमहरूको प्रशंसा गर्नुभयो।</p> <p>भेटमा दुई देशबीचको कूटनीतिक सम्बन्धलाई थप सुदृढ बनाउँदै आगामी दिनमा पनि प्रभावकारी समन्वय जारी राख्ने प्रतिबद्धता व्यक्त गरिएको छ। भेटवार्तामा कानुन तथा परराष्ट्र मन्त्रालयका उच्च अधिकारीहरूको समेत उपस्थिति थियो।</p> <p>#onlinepatinews #SobitaGautam #NepalFrance #DiplomacyNepal</p>