केरा, धनियाँ, एभोकाडो लगायतको आयातमा रोक, आँप ‘हट वाटर ट्रिटमेन्ट’ पछिमात्रै नेपाल आउन पाउने। काठमाडौं — नेपाल सरकारले जैविक सुरक्षा (बायोसेक्युरिटी) सम्बन्धी मापदण्ड कडा बनाउँदै विभिन्न कृषिजन्य वस्तुको आयातमा रोक लगाएको छ। आयातित उत्पादनमा हानिकारक रोग तथा कीराको जोखिम फेला परेपछि केरा, धनियाँ र एभोकाडोको आयात रोकिएको हो।सरकारका अनुसार भारतको केरला राज्यबाट आउने केरामा ‘पनामा रोग’को जोखिम, चीनबाट आयातित धनियाँमा हानिकारक किरा तथा युगान्डाबाट आयात गरिएको एभोकाडोमा ‘फाइटोप्थोरा पाल्मिभोरा’ रोग भेटिएपछि आयात अनुमतिपत्र जारी गर्न बन्द गरिएको छ।प्लान्ट क्वारेन्टिन तथा विषादी व्यवस्थापन केन्द्रले यस्ता रोग तथा कीराले नेपालकै कृषि उत्पादनमा गम्भीर असर पार्न सक्ने निष्कर्ष निकालेको जनाएको छ। विशेषगरी एभोकाडोमा भेटिएको रोगले बिरुवाको जरा, डाँठ र फलमा क्षति पुर्‍याएर सम्पूर्ण बोट नष्ट गर्न सक्ने जोखिम रहेको बताइएको छ।यसैबीच, विदेशबाट आयात हुने आँप भने अनिवार्य रूपमा ‘हट वाटर ट्रिटमेन्ट’ (तातो पानी उपचार) प्रक्रिया पूरा गरेपछि मात्र नेपाल भित्र्याउन पाइने व्यवस्था गरिएको छ। यस कदमले फलफूलमार्फत रोग तथा कीरा नेपाल भित्रिन नदिन सहयोग पुग्ने सरकारी विश्वास छ।सरकारले जैविक सुरक्षा मापदण्ड पालना नभएसम्म सम्बन्धित वस्तुको आयात नखुल्ने संकेत दिएको छ।