विपद् पीडितलाई होच्याउने आफ्नै पार्टीका सदस्यलाई पनि कारबाही गर्छौं : रवि लामिछाने। काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले बाढी, पहिरो तथा अन्य विपद्बाट पीडित नागरिकमाथि सामाजिक सञ्जालमा अमानवीय र अपमानजनक टिप्पणी गर्ने आफ्नै पार्टीका सदस्यलाई समेत कडा कारबाही गर्ने चेतावनी दिएका छन्। प्रतिनिधिसभामा बोल्दै लामिछानेले विपद्मा परेका नागरिकको पीडामाथि मजाक गर्ने, व्यंग्य गर्ने वा होच्याउने प्रवृत्ति कुनै पनि हालतमा स्वीकार्य नहुने बताए। उनका अनुसार राजनीतिक विचार र समर्थनभन्दा माथि उठेर विपद्को समयमा मानवीय संवेदना र पीडितप्रतिको सम्मानलाई प्राथमिकता दिनुपर्छ। लामिछानेले रास्वपालाई विपद् पीडितको पीडामाथि व्यंग्य गर्ने ‘अन्ध समर्थक’ आवश्यक नरहेको बताए। पार्टीलाई संकटमा परेका नागरिकको पक्षमा उभिने र कठिन अवस्थामा साथ दिने जिम्मेवार सदस्य आवश्यक रहेको उनको भनाइ थियो। उनले पार्टीको कुनै पनि तहका सदस्य वा पदाधिकारी साइबर बुलिङ, पीडितको अपमान वा मानवीय संवेदनाविपरीत गतिविधिमा संलग्न भएको प्रमाणित भए तत्काल कारबाही गरिने स्पष्ट पारे। त्यस्ता गतिविधिमा संलग्न व्यक्तिलाई साधारण सदस्यसमेत नरहने गरी पार्टीबाट निष्कासन गर्न सकिने लामिछानेले चेतावनी दिए। बाढी तथा अन्य विपद्का बेला सामाजिक सञ्जालमा पीडितलाई लक्षित गरी हुने अमानवीय टिप्पणीप्रति आपत्ति जनाउँदै लामिछानेले विपद्को समयमा राजनीति र आरोप–प्रत्यारोपभन्दा नागरिकको पीडा र मानवीय सहयोगलाई प्राथमिकता दिनुपर्ने सन्देश दिएका छन्। #onlinepatinews #RabiLamichhane #RSP #NepalPolitics