हरेक बर्ष नेपाल किन बग्दै छ ?। नेपाल छोटो दूरीभित्रै अत्यन्त विविध भूगोल र मौसम भएको देश हो। नेपालगञ्जजस्तो अत्यधिक गर्मी हुने क्षेत्रदेखि उच्च हिमाली क्षेत्रको कठ्याङ्ग्रिने जाडोसम्म, विश्वको सर्वोच्च शिखर सगरमाथादेखि गहिरा उपत्यकासम्मको अनुपम भौगोलिक विविधता नेपालमा पाइन्छ। अत्यधिक वर्षा हुने कास्कीको लुम्लेदेखि अत्यन्त कम वर्षा हुने मुस्ताङसम्म करिब १०० किलोमिटरको दूरीमै अवस्थित छन्। यस्तो विविध भूगोल र मौसम भएको नेपाललाई प्राकृतिक प्रकोपले पनि पटक–पटक निर्दयतापूर्वक प्रहार गर्ने गरेको छ। पछिल्ला वर्षहरूमा विशेषगरी असोज महिनामा भीषण वर्षा हुने क्रम बढेको देखिन्छ, जसका कारण नदी तटीय क्षेत्र र उपत्यकाहरू विशेष रूपमा प्रभावित हुँदै आएका छन्। बाढी, पहिरो र डुबानका कारण हरेक वर्ष ठूलो जनधनको क्षति हुने गरेको छ। दुर्भाग्यवश, वर्षेनि दोहोरिने यस्ता समस्याको दीर्घकालीन समाधानतर्फ सरकारले पर्याप्त ध्यान दिन नसक्दा देशले हरेक वर्ष उही पीडा र क्षति व्यहोर्न बाध्य भइरहेको छ।