भूमि प्रशासनका सफ्टवेयर र हार्डवेयर खरिदबारे छानबिन गर्न समिति गठन। काठमाडौं । भूमि व्यवस्था, सहकारी, संघीय मामिला तथा सामान्य प्रशासन मन्त्रालयले मातहतका निकायमा प्रयोग भइरहेका सफ्टवेयर तथा हार्डवेयर खरिद र प्रयोगको वास्तविक अवस्था अध्ययन गर्न एक समिति गठन गरेको छ। विशेषगरी नापी विभाग र भूमि व्यवस्थापन तथा अभिलेख विभागमा सञ्चालित नेलिस (NeLIS), एलआरएमआईएस (LRMIS) तथा ‘मेरो कित्ता’ प्रणाली व्यवस्थापनका लागि खरिद गरिएका उपकरण र प्रणालीहरूको गुणस्तर तथा उपयोगिताबारे अध्ययन गर्न उक्त समिति बनाइएको हो। मन्त्रालयको २०८३ भदौ २३ गतेको निर्णयानुसार सहसचिव धोलकराज ढकालको संयोजकत्वमा सात सदस्यीय समिति गठन गरिएको छ। समितिलाई काम सुरु गरेको सात दिनभित्र प्रतिवेदन बुझाउन कार्यादेश दिइएको छ। समितिमा प्रधानमन्त्री तथा मन्त्रिपरिषद्को कार्यालयका सूचना प्रविधि निर्देशक प्रतिनिधि, मन्त्रालयका उपसचिवद्वय देवेन्द्र सापकोटा र रामचन्द्र रेग्मी, लेखा अधिकृत दिगम्बर रिजाल तथा शाखा अधिकृत लोकमणि खनाल सदस्य छन्। यस्तै, कम्प्युटर इन्जिनियर दुबेश श्रेष्ठलाई सदस्य सचिवको जिम्मेवारी तोकिएको छ। समितिले खरिद प्रक्रिया प्रचलित कानुन र मापदण्डअनुसार भए/नभएको, उपकरणको गुणस्तर तथा उपयोगिताको स्थलगत अवस्था, र खरिदका क्रममा कुनै किसिमको अनियमितता वा सार्वजनिक स्रोतको दुरुपयोग भए/नभएको विषयमा विस्तृत छानबिन गर्नेछ। डिजिटल प्रणालीको प्रभावकारिता बढाउन तथा सार्वजनिक स्रोतको सही सदुपयोग सुनिश्चित गर्न समितिको अध्ययन प्रतिवेदनले महत्त्वपूर्ण सुझाव दिने अपेक्षा गरिएको छ। #onlinepatinews #NepalGovernment #LandManagement #TechNews