रसुवा–भोटेकोशी बाढीपछि खोज तथा उद्धारलाई निष्कर्षमा पुर्‍याउने तयारी। रसुवा–भोटेकोशी बाढीपछि जारी खोज, उद्धार तथा राहत कार्यलाई थप प्रभावकारी बनाउन केन्द्रीय मनसुन प्रतिकार्य कमाण्ड पोष्ट र रसुवा, नुवाकोट तथा धादिङका जिल्ला कमाण्ड पोष्टबीच छलफल भएको छ। भर्चुअल माध्यमबाट भएको छलफलमा तीनवटै जिल्लाका प्रमुख जिल्ला अधिकारीले खोज, उद्धार तथा राहतका क्रममा देखिएका पछिल्ला चुनौतीबारे जानकारी गराएका छन्। प्रभावित परिवारलाई तत्काल बसोबास तथा जीविकोपार्जनका लागि राहत उपलब्ध गराउने नीतिगत व्यवस्था र पुनर्निर्माणको काम अघि बढाउने विषयमा समेत छलफल भएको छ। छलफलमा खोज तथा उद्धारको समयसीमा निर्धारण गर्नुपर्ने, सम्पर्कविहीन बनेका बस्तीहरूबीचको **कनेक्टिभिटी तत्काल पुनर्स्थापना गर्नुपर्ने**, स्थानीयको मागअनुसार बाढीले थुपारेको गेगर तथा डेब्रिस व्यवस्थापन गर्नुपर्ने र पुनर्निर्माण गर्दा सडक तथा अन्य पहुँचसँगै स्थानीयको जीविकोपार्जनलाई प्राथमिकता दिनुपर्ने विषय उठाइएको थियो। केन्द्रीय मनसुन प्रतिकार्य कमाण्ड पोष्टका अध्यक्ष एवं प्राधिकरणका कार्यकारी प्रमुख डा. धर्मराज उप्रेतीको अध्यक्षतामा भएको बैठकले नियमित रूपमा विस्तारित बैठक तथा छलफल गर्दै पछिल्ला चुनौती समाधान गर्ने निर्णय गरेको छ। खोज, उद्धार तथा राहतलाई निष्कर्षमा पुर्‍याउँदै प्रभावितका लागि अस्थायी आवासको व्यवस्था गर्ने र त्यसपछि स्थायी पुनर्निर्माणतर्फ अघि बढ्ने विषयमा समेत छलफल भएको छ। #onlinepatinews #RasuwaFlood #FloodRescue #NepalDisaster #Reconstruction