बाढीपीडितका नाममा गैर-कानुनी रकम संकलन विवादमा हर्क साम्पाङ। नेपाल सरकारले बाढीपीडितका नाममा कुनै पनि व्यक्ति वा संस्थाले निजी रूपमा रकम संकलन नगर्न आग्रह गर्दै सहयोग गर्न चाहनेहरूलाई सरकारको आधिकारिक खातामार्फत सहयोग गर्न अनुरोध गरेको अवस्थामा श्रम संस्कृति पार्टीका अध्यक्ष हर्क साम्पाङले भने सामाजिक सञ्जालमार्फत सहयोगका लागि सम्पर्क नम्बर सार्वजनिक गरेको विषय विवादमा परेको छ।साम्पाङले फेसबुकमा उपलब्ध गराएको उक्त नम्बरमा ह्वाट्सएपमार्फत सम्पर्क गर्दा पूर्णबहादुर राई नामका व्यक्तिले व्यक्तिगत बैंक खाताको विवरण उपलब्ध गराएको दाबी गरिएको छ। सरकारी आग्रहविपरीत निजी खातामार्फत रकम संकलन गरिएको भन्दै यस विषयमा प्रश्न उठ्न थालेका छन्।यसअघि विभिन्न राजनीतिक दल, सामाजिक अभियन्ता तथा संघसंस्थाले समेत निजी वा संस्थागत खातामा रकम संकलन नगरेको देखिन्छ। त्यस्तै, गृहमन्त्रीसँग जोडिएको ‘हामी नेपाल’ नामक संस्थाले आर्थिक सहयोगका लागि क्यूआर कोड सार्वजनिक गरेपछि चौतर्फी आलोचना भएको थियो। आलोचनापछि उक्त पोस्ट हटाइएको बताइएको छ।तर हर्क साम्पाङले सार्वजनिक गरेको पोस्ट भने हालसम्म नहटाइएको र निजी खातामार्फत रकम संकलन भइरहेको दाबी गरिएको छ। यस विषयमा सम्बन्धित पक्षको आधिकारिक प्रतिक्रिया भने आउन बाँकी छ।